ЧАСТЬ II

ДУХОВНОЕ НАСЛЕДИЕ АРХИМАНДРИТА ИСААКИЯ

(молитвы)

Молитва ко Господу Иисусу Христу

Господи Иисусе Христе, Сыне Божий, Преблагий и Милосердный Спасителю наш! Велики и многи скорби приидоша ныне на Церковь Твою Святую и на верные люди Твоя, егда обышедше обыдоша нас ненавидящий нас и силы наша оскудеша. Вемы, Господи, яко подобает всем сим быти. Веруем, яко непреложно есть слово Твое и врата адова не одолеют Церкви Твоей и яко претерпевый до конца спасется. Обаче молим Тя усердно от всея души своея и от сокрушеннаго своего сердца: сократи силу зла на Земли! Ибо немощни и дряхли есмы, и несть помогали, и все упование наше токмо на Тя возлагаем. По грехом нашим изволил еси попустити, да вся сия будут. Мы же вопием Ти: даждь нам и мужество вся сия претерпети, и малодушием своим не посрамити имене Твоего святаго, но да и нами прославится оное во веки веков. Аминь.

Молитва преподобному Исаакию-исповеднику,
игумену обители Далматския

Великий угодниче Божий, преподобне и богоносне отче наш Исаакие! Днесь, сошедшеся в память твою, верою и любовию чтим тя, добраго воина Христова, монахов наставника и собеседника Ангелов. Ты, яко светильник сияющий, не возмогл еси в пустыни под спудом укрытися и, возсияв верным и неверныя обличая, пришел еси в град Царский за истину добре подвизатися. Ты обоюдоострым мечом веры и исповедания твоего два богохульных учения посекл еси: безбожнаго Ария, егда царю Уаленту о затворении церквей православных трикраты противоборствовати потщался еси, и нечестиваго Македониа, егда со славными отцы Втораго Собора Вселенскаго о Дусе Святе боголепно богомудрствовал еси. Ты, ревностно бразды Уалентовы удержав, за истину Божию прияти муки сподобился еси, жезлием во главу ударяем и в ров тинный ввергаем, отонудуже, яко бисер многоцветный, паки возблистал еси. Ты, в лице преподобных стоя, и лику пророческому сопричелся еси, егда о погибели царя злонравнаго, яко плевел, в огне сожженнаго, предрекл еси. Память твоя воистину ныне, Исаакие отче, веселит сердца поющих тя, и на подвиг твой славный взирающих, и смиренно тебе молящихся. О столпе веры и благочестия, утверди нас в православней вере, подвигни на добрая дела, даждь силу молитвами твоими и нам противустати козней диавольских и искушения, от сего духа злобы и от мира сего находящая, мужественне претерпети. Якоже собрал еси учеников твоих в обители своей, быв тем лествица мысленная, к Царству вечному возводящая, собери и нас, расточенных, и путь правый ко спасению укажи нам. И якоже не возгнушался еси от пустыннолюбия своего на стогны града прийти, любве ради Христовы и о ближних своих пекийся, и в наш живот суетный вниди и упаси стадо Христово кротостию своею. Бог же мира, Отец щедрот, в мир тя пославый, яко Ангела земнаго и человека небеснаго, и ныне тобою славимый у Престола Вышняго, да прославлен будет и нашими устами бренными всегда, ныне и присно и во веки веков. Аминь.

Пред Елецкой иконой Божией Матери

Пресвятая Владычице, Дево Богородице, Мати Господа и Спаса нашего Иисуса Христа, страны же нашея и града сего Покровительнице и Заступнице! Пред святою Твоею иконою, по завещанию предков наших благочестивых нами чтимою, приими сие благодарственное хвалебное моление и прошения наша ко Господу вознеси в час сей и во всякое время.

Истинно слово речено бысть о святых твоих иконах, Богородице, яко правдивая сказания о них и о чудесах от них, во отечествии нашем бывших, суть священныя летописи деяний народа нашего, во время оно все упование свое на Тя возлагавшаго и страну нашу Российскую дом Пресвятыя Богородицы устроити чаявшаго. Ты же, Всеблагая, сохранила еси его под кровом Твоим, и, на сию святую икону Твою умильно взирающе, в памяти своей благоговейно зрим, како во граде сем величие Твое и силу Твою явити изволила еси и от грознаго врага и супостата Темир-Аксака* и полчищ его праотцев наших избавила еси. Памятуем бо, яко в той самый судьбоносный день, егда людие московстии со князем своим и митрополитом вкупе, сретающе икону Твою Владимирскую, коленопреклоненно пред нею единогласно взываху: "Мати Божия, спаси Землю Русскую", — Ты, Владычице, в пределех сего града нашего на горе Аргамачстей явилася еси безбожному Темир-Аксаку, в шатре своем сущу, представши ему во окружении воинства сил небесных и сонма святителей российских, и повелела еси ему абие пределы града сего и всея страны нашея оставите. И устремися вспять сей новый фараон губительный, и спасена бысть земля Русская благодатным и мощным Твоим заступлением. Ныне же, молящеся у гробниц приснопамятных предков наших, в борьбе с Темир-Аксаком за веру и Отечество свое на поле брани живот свой положивших, к Тебе, Небесе и земли Царице, сице взываем, во вся прежния дни горестей наших милостивно на нас призиравшая! Буди милостива и ныне к нам, недостойным, о гресех своих плачущим! Собери нас, яко мати собирает птенцы своя под криле свои, и настави нас на путь спасения. Умири, утверди и благослови Церковь нашу Святую Православную, вся священнослужители и верныя слуги ея. Помози отцем и матерем наставити на благое чада своя. Вразуми чад, да чтут родителей своих и наставников в вере святей и истинней. Отврати сердца наша от греха и возжзи в нас огнь святаго милосердия; да возненавидим зло, да узрим бездну падения нашего и возлюбим ближняго своего, да отвержемся себе, да возьмем крест свой и пойдем к свету Истины, просвещающий мир. Наипаче же молим Тя, Владычице Милостивая: возстави нам в древнем благочестии Русь нашу Православную, тысящами свещ и лампад к Богу своя молитвы, яко фимиам, возносившую и сонмом угодников своих просиявшую, и сотвори ю дом Свой, якоже и праотцы наши того желаху. Сокруши силу зла на земли и пролей в наша умы луч разума, да Тобою спасаеми, по смерти рай просветлый обрящем и Триединому Богу хвалу, благодарение и поклонение возсылаем ныне и присно и во веки веков. Аминь.

* Тамерлана, Хромого Тимура (Аксак - хромый)

Тропарь, глас 4:

Днесь светло красуется древний град Елец,
поминающе славное чудо Пресвятыя Богородицы:
егда бо на стогнах пер-вопрестольныя Москвы
икону Ея чудную людие московстии сретаху,
тогда Сама Владычица на горе Аргамачстей во граде Ельце,
в сретение нечестивому Тамерлану изшедши,
грозное его нашествие вспять обрати.
Сего дивнаго явления изображение на новописанней иконе зряще
и Заступницу нашу за вся благодеяния Ея благодаряще, умильно к Ней взываем:
и в предняя не остави нас, о Мати Милосердая.

Молитва Божией Матери от лица изографов

Пресвятая Владычице, Дево Богородице, Мати Христа Бога нашего!

Вонми гласу моления нашего, от сердец, любящих Тя, Тебе приносимаго, Ты бо еси первая изографскаго дела Покровительница, Ты еси и первая, Яже образ Твой пречистый на утешение роду христианскому, Тя ублажающему, благословившая. Ты бо возрадовалася еси иконе Твоей, первее написавшейся, егда иконописцев начальник и евангельских тайн благовестник Лука апостол ю Тебе принесе, и Сама рекла еси милостиво, обаче со властию, на икону ту зрящи: "С сим образом благодать Моя и сила" *.

Пробави милость Твою и силу Твою и нам, убогим, дерзающим и в наша дни, при скудости своей и маловерии, Твой пречистый лик начертовати и Предвечнаго Младенца Христа, на руках Твоих носимаго. Укрепи нас в сем делании во славу имене Твоего святаго, утверди руце наши, Твоя неописуемым и божественныя черты написующия, и чрез святыя Твоя и честныя новыя иконы даруй и новую и нечаянную радость на них взирающим и пред ними Тебе молящимся. Ты бо еси, по речению великаго Твоего чтителя, Тобою избраннаго и Тобою любимаго преподобнаго отца нашего Серафима, всех радостей Радость. И Тебе славу и благодарение и благоговейное поклонение воздаем ныне и во веки веков. Аминь.

* Зри стихиру третью на литии из Службы 23 июня, Сретению иконы Божией
Матери, именуемой "Владимирская"

22/ 9 августа 1962 года
(во исполнение давнего обещания)

Молитва пред Казанской иконой Божией Матери
от лица человека, имеющего болезнь очес

Премилостивая Мати Всемилостиваго Бога! С верою и любовию и крепкою надеждою на милость Твою к нам, грешным и немощным, обаче же и чадом Твоим сущим, и аз дерзновенно мольбу свою к Тебе обращаю в душевней моей горести и в телесней немощи болезнующих моих очес. Памятую со умилением сердечным, каковое первое дело милосердия Своего явила еси, в час обретения от земли сея святыя Твоея иконы Казанския, пред неюже ныне смиренно колена своя преклоняю. Бысть же оное чудо — дарование зрения слепому, на радость ему и утешение, всем же то зревшим на удивление. И тако доныне назидает нас Церковь Святая к честней иконе Твоей Казанстей прибегати всем молящимся об исцелении болезни очес. О Милосердная наша Целительнице! Услыши и мою молитву в час сей, утоли болезнь слабых моих очес, остави в них аще и малую силу, да зрят мир Божий, Сыном Твоим сотворенный. Аминь.