Кондак 1

Избранней Владычице и Заступнице рода христианскаго, знамениями чудес дивных от святыя Своея иконы в стране нашей возсиявшей, благодарственная и умиленная пения немолчно приносяще, яко Матери Господней, в печалех наших и болезнех вопием:

Радуйся, скорая Утешительнице и Целительнице, любовь Свою и милосердие нам являющая.

Икос 1

Архангели и Ангели, Херувими и Серафими и вся Небесныя Силы, зряще Тя на небеси и на земли, яко неисчерпаемый источник благодатных исцелений, непрестанно славят Тя, Присноблаженная Богородице: мы же, грешнии на земли, поминающе дивное знамение милости Твоея, еже в сия последняя времена явила еси в цельбоносней иконе, наследии предков дражайшем, от лет древних из рода в род преходящей ублажаем Тя сице:

Радуйся, Небесная Царице, Честнейшая Херувим и Славнейшая без сравнения Серафим;
Радуйся, от всех родов на земли похвалами ублажаемая.
Радуйся, одесную Сына Твоего и Бога предстоящая;
Радуйся, ко Господу Спасу всех нас приводящая.
Радуйся, яко в видимом образе Твоем невидимую силу благодати обретаем;
Радуйся, яко на Твое предстательство все упование наше возлагаем.
Радуйся, скорая Утешительнице и Целительнице, любовь Свою и милосердие нам являющая.

Кондак 2

Видящи Тя, Благосердая Мати, в пречудней иконе Твоей, якоже сущую с нами, страждущая в неисцельном недузе девица Мариа, со слезами и верою объят икону Твою, лобызающи ю и чающи от Тебе великия милости. Темже исцеление улучивши, абие велегласно возопи к Богу: Аллилуиа.

Икос 2

Разум богопросвещен имуще родители исцелевшей всем людем проповедаша о чудеси явленном от святыя иконы сея, да вси притекают к ней с верою и приемлюще скорая исцеления, прославят Тя взывающе:

Радуйся, Мати Божия, прошения болящих приемлющая;
Радуйся, Мати милосердия, от очес слезы страждущим отирающая.
Радуйся, Всемилостивая, спасение людем от Спаса являющая;
Радуйся, Всещедрая, Своими щедротами нас одаряющая.
Радуйся, яко Тобою душам нашим утешение обретаем;
Радуйся, яко во успении Твоем залог безсмертия уразумеваем.
Радуйся, скорая Утешительнице и Целительнице, любовь Свою и милосердие нам являющая.

Кондак 3

Силою Духа Божия водима Мариа исцеление улучивши, с радостию велиею взят святую икону родную и во град Москву ко отцу и врачем тую принесе во свидетельство им, да не сокрыт будет новоявленный источник благодатных исцелений. Множество же народа, уведевше, к предивней иконе с верою прихождаху и исцеление недугов своих неисцельных приимаху, благодарно взывающе ко Господу Сил: Аллилуиа.

Икос 3

Имущи вседрагую икону Твою, Владычице, яко дар благодатный, радости исполнися обитель Козельщанская, на горнем месте молитвою, потом, скорбьми и слезами созданная: зрящи бо на руцех Твоих Богомладенца, Крест Всечестный в деснице Своей воздвизающа, чашу же и лжицу близ того предлежащу, с трепетом лобызает святыню Твою, взывающи согласно:

Радуйся, Одигитрие, ко обителем Горним путь открывающая;
Радуйся, святую обитель нашу в жилище Себе на земли устроившая.
Радуйся, Крест Сына Своего, яко оружие острое в сердце Твое восприявшая;
Радуйся, всем на земли Крест Христов на ся вземшим понести облегчающая.
Радуйся, иночеству, обитель Твою возлюбившему, смысл добраго жития даровавшая;
Радуйся, чашу терпения и во гладе питание ему благосердно навеки принесшая.
Радуйся, скорая Утешительнице и Целительнице, любовь Свою и милосердие нам являющая.

Кондак 4

Буря велия иногда укротися сему образу Твоему, шествующу по Русскому морю ко Отечеству нашему и вси воини христолюбивии благодатно от потопления спасошася. Темже и мы, сицеваго явления поминание творяще, в бури жития нашего руку помощи сею иконою Твоею получити тщимся, Сыну же Твоему и Богу вопияти дерзаем: Аллилуиа.

Икос 4

Слышим множество чудес от иконы Твоея являемых, яко и вси концы земли ко Твоему Покрову, не токмо вернии, но и чуждии вере православной со страхом и упованием к Тебе, Богородице, руце свои простирают и, припадающе ко Твоему благосердию, славословия Ти сицевая возсылают:

Радуйся, ума нашего просвещение;
Радуйся, сердца нашего умиление.
Радуйся, веру крепкую в нас утверждающая;
Радуйся, на спасения стези заблуждших обращающая.
Радуйся, в покаянии грешных ободряющая;
Радуйся, и самых отчаянных надеждою спасения увеселяющая.
Радуйся, скорая Утешительнице и Целительнице, любовь Свою и милосердие нам являющая.

Кондак 5

Богом прославленную икону Твою, яко живоносный источник святыни почитающе прибегаем к Тебе во храм Твой благолепный, во славу Твою, Премилосердая Мати, созданный: приими зде, якоже кадило благовонное, прошения всех нас, да благодарне воспоем благодеющему Тобою Богу: Аллилуиа.

Икос 5

Видевше неоскудное чудес излияние, от иконы Твоея являемое, православнии люди потщашася дарми послужити Тебе, Преблагословенная, и вместо кущи малыя, в нейже первее икона Твоя водворися, честный храм Тебе от древес сложиша, последи же и сей дом, Небеси подобный, Тебе воздвигоша: таковому усердию людей Твоих, веру неослабную к Тебе имущих радующеся непрестанно глаголати Тебе дерзаем:

Радуйся, страну Полтавскую светом веры озарившая;
Радуйся, явлением чудес от святыя Твоея иконы всех увеселившая.
Радуйся, Горо благодати небесныя, на горнем месте обитель Твою утвердившая;
Радуйся, Кивоте святыни небесныя, во храме созданном жилище Себе восприявшая.
Радуйся, Божественная Трапезо и Стамно Златая, небесною манною всех напитавшая;
Радуйся, Лествице высокая, путь земным к Небеси показавшая.
Радуйся, скорая Утешительнице и Целительнице, любовь Свою и милосердие нам являющая.

Кондак 6

Проповедует мир весь величие Твое, Богомати, славит Тя наипаче же страна Российская немолчно; ликует обитель святая Твоя, святителей лик воспевает Тя присно, монаси и мирстии к иконе Твоей припадают; хор земнородных согласно взывают: незабуди всех нас, Всепетая Дево, мир мирови даруй и в скорбех обрадуй, всем радость пошли и воплю вонми; да воззовем вси с небожительми купно Небесному Богу: Аллилуиа.

Икос 6

Возсия яко свет от небес обитель Твоя, Приснодево Владычице Чистая; коликое множество предивных чудес являеши Ты: се отрок недвижим дыханием веры жизнь прояви; тамо слепец Иоанн не преста вопияти: даруй ми, Мати моя, да очима прозрю; и свет от Тебе слепоту его озари. Притекаем убо и мы к чудотворней иконе Твоей, вопия:

Радуйся, твердая и необоримая наша Заступнице;
Радуйся, рода христианскаго всемощная Защитнице.
Радуйся, градов и весей Покров и Ограждение;
Радуйся, обителей святых Благословение и Утверждение.
Радуйся, яко пред святою иконою Твоею знамения чудес созерцаем;
Радуйся, яко на Твое предстательство все упование свое возлагаем.
Радуйся, скорая Утешительнице и Целительнице, любовь Свою и милосердие нам являющая.

Кондак 7

Хотящим врагом обитель Твою утеснити инокинь стадо о Христе любовию собранное, враждой поразити, скоро познаша сии Твое заступление, стеной необоримой Твоей обстоими, и мы с верою взираем в грядущую даль веков и времен благодарно вопия Спасителю Богу: Аллилуиа.

Икос 7

Дивно и доныне прославляется святая икона Твоя, Владычице, знамениями исцелений от нея являемым. Ты бо, Пречистая, бесныя исцеляет и, хромым даруеши хождение, слепым прозрение, расслабленным крепость и силу и всяк недуг в людех по вере врачуеши. И мы, видяще чудеса сия и стекшеся в храм Твой благолепием чистым сияющий молим Тя неотступно:

Радуйся, всем призывающим Тя скоро готовая помощь;
Радуйся, преславней обители Твоей, всем страждущим и скорбящим светлая Радость.
Радуйся, яко в иконе Твоей чудотворящей залог милости вечныя обретаем;
Радуйся, яко Твоею благодеющей силой в житии своем путь к Небеси улучаем.
Радуйся, всех немощных духом и телом врачевство верное;
Радуйся, всех скорбящих и обремененных облегчение всеблагое.
Радуйся, скорая Утешительнице и Целительнице, любовь Свою и милосердие нам являющая.

Кондак 8

Странное и преславное видим таинство, яко дивная ужасное явила еси во обители Твоей о неисчерпаемая в чудесех Своих благостыня! Егда воутрие предпразднества Твоего Вхождения во храм Господень приведоша сестры инокиню Параскеву, зело разслабленну ко Твоему Пречистому Образу: и сию укрепила еси во мгновении ока, даровав ей силу и движение омертвелому составу ея телесе: и сподобися та за Божественной службой Святых Таин Причастиа. Последи же исходя, воспет со множеством людей, бывших во храме, хвалу Богу: Аллилуиа.

Икос 8

Всяк земнородный да взыграется Духом просвещаемь и освящаемь от цельбоносныя святыни Твоея. Радосте наша и Похвало да не умолчит никогда силы Твоя глаголати, аще и недостоин есть, пред величеством славы Твоея; сего ради и мы преславная глаголем о Тебе, Неизглаголанная Тайно; приими сицевая от нас, яко от глубин духа нашего возносимыя хвалы и благодарения:

Радуйся, Хранительнице наша в настоящем веце;
Радуйся, Предстательнице наша в будущем.
Радуйся, жестокость и окаменение сердца нашего любовию Своею умягчающая;
Радуйся, чистым и благим сердцем познавати Тя научающая.
Радуйся, яко страсти наша Тобою побеждаем;
Радуйся, яко жало греховное страстию Сына Твоего и Бога в себе умерщвляем.
Радуйся, скорая Утешительнице и Целительнице, любовь Свою и милосердие нам являющая.

Кондак 9

Всякое естество человеческое удивися преславному чудеси, явленному исперва последи же и всем явленным и являемым зде и на всяцем месте от святыя иконы Твоея, Преблагословенная Матерь живота, всяку похвалу от земли превосходит небесная слава Твоя: не точию земли нашея, но и иных стран любомудрие и врачевство преклоняются смиренне и честне пред величеством непостижимыя тайны исцелений от Твоея силы источаемых. И мы грешнии в недузех и скорбех отягченнии, не вемы иныя на земли Заступницы, ни благия Утешительницы, токмо Тебе, о Богомати: ко Твоему благосердию припадая во умилении сердца за премногую милость к нам, недостойным, возсылаем Богу милующему и спасающему всех нас Тобою: Аллилуиа.

Икос 9

Витийство человеческое не возможет достойно воспети Тя, о Всепетая Мати, всему миру и стране нашей во святыни икон Твоих неисчислимая знамения и чудеса явльшую; мы же, просвещаемии, сиянием таковыя славы и богатством милостей Твоих недостоинству нашему, непрестанно тщимся хвалу Ти воздати молении сими:

Радуйся, Царице Небесе и земли, Престолу Господню предстоящая;
Радуйся, Заступнице вечная, Христа за ны умоляющая.
Радуйся, Мати чадолюбивая, всех охраняющая;
Радуйся, заблуждших от пути истины к покаянию призывающая.
Радуйся, Молебнице теплая, Судию всех умилостивляющая;
Радуйся, вход во Обители Вечныя кающимся открывающая.
Радуйся, скорая Утешительнице и Целительнице, любовь Свою и милосердие нам являющая.

Кондак 10

Спасти хотя избранную Богом страну и прибегающия к Тебе люди, дивно прославила еси, Богоматерь Пречистая, икону Твою Козельщанскую промыслительными знаменьми милостей Твоих всебогатых. Аще бо не бы предстояла молящи о нас, кто бы ны избавил от толиких бед; кто бы сохранил ны до ныне свободны. Несть числа чудесем Твоим, Всеблагая. Не отступим, Владычице, от Тебе. Даруй ныне и присно всем нам зрети своя прегрешения, открый в нас источники слез, да омыем падение в бездны греховныя и познав Твоего милосердия неизследимую бездну, возстанем и поработаем поя к Небесам прославльшему Тя Всемогущему Богу: Аллилуиа.

Икос 10

Стена еси крепкая обители Твоей якоже и всему миру, ограждающи нас от врагов досаждения, верою и любовию чтущих Тя, честному образу Твоему покланяющихся и приносящих тепле благодарения таковая:

Радуйся, чистоты девства и целомудрия сердца ревнителей в любовь Своего сердца приемшая;
Радуйся, печаль и обиду от мира в Небесную радость по вере преложшая.
Радуйся, вдов и сирот заступление;
Радуйся, домашних церквей охранение.
Радуйся, сласти земныя презирати нас научающая;
Радуйся, преходящия блага мира греховнаго нивочтоже вменяти побуждающая.
Радуйся, скорая Утешительнице и Целительнице, любовь Спою и милосердие нам являющая.

Кондак 11

Пение архангельское умиленно приносим Ти, Богородице Дево: Радуйся, Благодатная Марие, Господь с Тобою, благословенна Ты в женах! - обаче и тако величия славы Твоея объяти не мним: высоте бо еси неудобовосходимая человеческому помыслу и глубино неудобозримая и ангельскому очеси; кий язык восхвалит Тя; кое слово возвеличит познавая убо таковыя немощи наша - трепетно вопием Рожденному от Тебе Божественному Слову: Аллилуиа.

Икос 11

Яко светоносная свеща явися святая икона Твоя, Владычице и Матерь Света. Свет благодати небесной всем излиявшая, пред Нею же мы благоговейно предстояще взываем Ти: избави грады и веси, домы и нивы наша от всякаго вреда и зла, да с благодарением непрестанно воспоем Ти:

Радуйся, удары грома и молнии от нас отводящая;
Радуйся, от сухости, града, червя и иныя пагубы вертограды и нивы наша спасающая.
Радуйся, от огненнаго запаления и зловредных поветрий нас орошающая;
Радуйся, от глада и смерти напрасныя нас свобождающая.
Радуйся, путь шествующим по суше и морю вспоможение крепкое;
Радуйся, язв душевредных и болезней телесных врачевание верное.
Радуйся, скорая Утешительнице и Целительнице, любовь Свою и милосердие нам являющая.

Кондак 12

Благодать Твою свыше подаждь нам, Богоблагодатная Дево; до последних дней мира святую обитель Твою сохрани; восхотевшим в ней жити путь добр к Небеси укажи; любовь и терпение со страхом Господним стяжати в сердцах умудри, да со Ангелы и всеми святыми воспоют Превечному Богу: Аллилуиа.

Икос 12

Поем чудеса Твоя от святыя иконы пред всеми явленныя, величаем Подателя всяческих Бога, даровавшаго в ней толикое всем утешение: болящим исцеление, скорбящим радование, нищим помощь, окованным свободу, мятущимся духом упование бодрое, слабым в вере укрепление твердое: - зрим начертание кроткаго Лика Твоего и объятаго любовию Твоею, Богомати, Богомладенца Христа: лобызаем священные символы страданий Его за грехи всего мира - Крест и Чашу Святую, - и покланяемся непостижным тайнам: от Тебе рождества Непобедимой Силе Креста и Светозарнаго всем Воскресения, воспеваем Ти вечную славу:

Радуйся, во славе приседящая Сыну Твоему па Престоле Небесном;
Радуйся, прерадованная Мати Царева, мир христианский под вечный покров Своей любовию объявшая.
Радуйся, уповающим на Тя конец живота непостыден дающая;
Радуйся, безболезнену и мирну кончину верным Богу до смерти ниспосылающая.
Радуйся, в мытарствех воздушных душе человечестей путь к Судии указующая;
Радуйся, взывающим к Тебе до конца живота красоту вечныя жизни яве являющая.
Радуйся, скорая Утешительнице и Целительнице, любовь Свою и милосердие нам являющая.

Кондак 13

О, Всепетая Мати, Божественная славо и красото небесе и земли, неисчерпаемое чудес море, заступнице и Хранительнице рода христианского и святыя обители Твоея, приими недостойное сие, обаче благодарное от сокрушенного сердца возносимое к Тебе моление; яви нам до конца Матернее Твое милосердие: в скорби и напасти не остави нас сирых и в час смертный Твоим теплым предстательством причастники вечнаго блаженства сотвори, да памятуя выну Твоя дивная о нас заступления со всеми святыми не престанем воспевати Богу: Аллилуиа.

(Этот кондак читается трижды, затем 1-й икос и 1-й кондак)

Молитва 1-я

Богородице Дево Пренепорочная Мати Христа Бога нашего, Заступнице всего рода христианскаго! Чудотворней иконе Твоей благоговейно предстояще, молим Тя, услыши нас, молящихся Тебе: приими благодарения наша недостойная о всех неизреченных Твоих к нам благодеяниих, в месте сем и во многих весях и градех земли Российския явленных и являемых; Ты бо еси больных исцеление, скорбящих утешение, заблуждших исправление и вразумление. Буди всем нам покров и утешение, пристанище от всяких зол, бед и обстояний, от глада, труса, потопа, огня, меча, нашествия иноплеменник, смертоносныя язвы и от злых человек озлобления. О Премилосердая Мати, буди присно молитвенница любвеобильная о благостоянии святаго храма сего, о мире и тишине жительства общины сея, укрепи и поддержи священнодействующия и служащия во святем храме сем. Осени вседержавным покровом Твоим строители и благотворители святыя обители сея, воздаждь им вечными дары щедрот Твоих, заступи от всякия напасти и сохрани с верою и благоговением притекающия к чудотворной иконе Твоей и молящияся Тебе с любовию зде и на всяком месте. Вознеси молитвы наша, яко кадило благовонное, ко Престолу Всевышняго, дарующаго нам здравие, долгоденствие и в трудех благочестивых поспешение, да Твоим окормлением управляеми, и покровом Твоим осеняеми, прославим Отца, Сына и Святаго Духа и Твое Матернее о нас заступление, всегда, ныне и присно и во веки веков. Аминь.

Молитва 2-я

О Пресвятая Дево Владычице Богородице, добропослушная Божественному Слову, Мати Пречистая от всех родов избранная, на небеси и на земли ублажаемая, приими и сие благодарение наше и всеблагоговейное поклонение чудотворней иконе Твоей юже яко многоцелебный источник Твоея благодати благоизволила еси явити стране нашей православней и святей обители сей. Архангельский глас вопием Ти; Чистая, - Обрадованная, радуйся, с Тобою Господь и Тобою с нами! Предстательством Твоим и заступлением. На Небеси у Престола Всеблагаго Бога никтоже да изыдет отсюда упования своего тощ и неуслышан. О, Пречудная и высшая всех тварей небесных и земных Богомати Дево, благодарне поминая преславная чудеса от святаго образа Твоего дарованная, молим Тя, Всеблагая, не лиши от него и нас дивнаго знамения во спасение наше. Помяни щедроты Твоя древния, в судьбах Отечества нашего явленная, и да престанем вси от лукавств своих имиже прогневахом Тя в век сей мятежный удалением от любве еюже возлюби и возрасти нас Церковь Святая. О, Премудрая небесная началоводительнице ко спасению инокинь обители именем Твоим нареченной юже избрала еси в достояние Свое на месте сем Тобою благословеннем, яви ю пристанище тихое всем скорбящим и обремененным и чающим блаженныя вечныя жизни. Грешнии есмы, Пренепорочная Владычице, но Твои до века. Озари убо души наша светом Божественная благодати Твоея, покрый нас от всякаго зла, скорби и печали: огради от всякия напасти, клеветы человеческия и навета вражия; немощным и болящим здравие даруй; кающихся грешников прости и от плена страстей свободи; отступившия от православныя веры и погибельными ересьми ослепленныя светом богопознания просвети и святей Апостольстей Церкви причти. Молим Тя, умиленно, сохрани и помилуй пастырей Церкви Православныя и всех верных чад ея; утверди житие наше в мире; управи пути и советы наша в правде, во еже открытися в них Царству Христову: даруй нам кончину христианскую, безболезнену, непостыдну, мирну, Божественных Таин причастну, и Сама нам в час той предстани и спаси посреди мытарств воздушных от мрака и скорби лютыя; в страшный же день Суда сподоби ны стати одесную Сына Твоего Христа Бога нашего. Молим Тя, Дево Всепетая, призри благосердием Твоим на обитель сию и сохрани ю до века целу и неврежденну, да выну чистотою возвышается и славится в ней величество Единосущныя Троицы и Твое препетое и преблагословенное имя во веки. Аминь.

Тропарь, глас 4

Веселися земле Полтавская, и все Отечество наше православное: се бо яко светозарное солнце, явися пречудная икона Твоя, Преблагословенная Богомати, Мир озаряющи множеством чудес Своих, Тою убо обретаем яже на земли вся благая и полезная, и сущих на небеси сокровищ сподобляемся. Сего ради вопием Ти: радуйся, Похвало наша приснопокланяемая, спаси ны, Тебе молящияся, Едина Надежда и Радование вечное поющих Тя.

• < Назад
• Далее >